紐迷週記:咸魚翻生係美德?|The Outsider

經過一輪國際賽期之後,紐卡素作客打敗打比郡,升上聯賽榜第二位。紐記戰績穩步上揚,但為戰況未如結果咁一面倒。開賽初期後防受壓,中場防守不力,經常被打比郡既球員用簡單既快傳晃過。皮雅臣帶李斯特城護級成功,除左有馬列斯、華迪、真禾特助陣之外,佢都真係有兩三下散手。不過打比既前鋒著錯鞋定無拜神(even我都唔信),上半場好幾個機會都把握唔到。反而被古法蘭喺20分鐘接應角球射入1:0!

呢球防守回然係有問題,但係古法蘭射得係幾靚。之後紐記開始踢上風波,但係喺組織同進攻路線上面都好單調。打比郡既球員有心無力,喺補時階段走甩艾約斯,右路傳左個中腰波出嚟,後上既耶連快腳一撞、中龍門再反彈自己入網,2:0完場全取三分。

紐卡素做球員買賣生意做得好出色,今個球季仲有錢賺,對上一季大出血嚟講,收返多少就多少喇。有好多朋友都話,咁樣樣放走啲球星,隊波仲有力挑戰英超?家陣踢英冠都唔係超班嗰隻,真係咁樂觀?

我又咁睇,上年或者再之前購入既球星,喺第二隊可能踢得風山水起,但係佢哋既人工都唔平,更離譜既係好幾個球員交唔到貨,人工仲要係英超級別!所以呢輪清貨同入貨大行動,其實係為左清減多餘資產同埋減少薪金開支,令球隊既財政更穩健,應使則使喇。清走既球員,好多都係年紀唔細又或者潛力見底。高調賣走既施素高、韋拿杜姆,其實你想留亦都留唔住,不如趁有好價錢賣走套現。

家陣個陣容的確唔夠完善,但係個個都係有鬥心既球員,季初對戰術同賓帥既理念未了解,季中再去評論都未遲,最緊要係有得改造,大家又睇睇之後既發展。

另外一個話題都幾熱門,就係古法蘭算唔算咸魚翻生。老實佢腳下功夫嚟算上息,但係有鬥心同肯投入比賽,你叫佢打防中都制,何況你叫佢踢左中場呢個咁大發揮既位置呢?佢喺英冠捱得撞又勤力,佢既復甦係佢自己努力爭取返嚟,我哋應該俾啲掌聲佢。天道酬勤、將勤補拙,係真理、係美德。

下星期再見。

Comments

comments