紐迷週記:繼續企|The Outsider

先回帶到英國甲組足球賽事年代,當年冠軍爭奪戰,唔記得邊年,由利物浦大戰阿仙奴。當時年紀小,真係悉尼老鼠咩!只係覺得利物浦件衫好得意,灰色、心口印住Candy,心諗佢哋咁為食㗎…之後阿仙奴由個又高又瘦嘅後生仔捧盃,佢叫阿當斯。而對家有一個球員,一攞波,就會叫佢全名:通天佬倌尼高,大個之後先知佢叫尼高,通天佬倌係形容詞。

再大啲有直播睇,係足總盃嚟嘅,咩爆冷嘅溫床,真係以為有張床,無聊。但係水晶宮由伊恩胡禮同柏祖帶領之下,輸左俾紅魔鬼曼聯;下一年又到愛華頓輸俾紅魔,當時作為勝利球迷嘅我,決定一世都唔喜歡曼聯。而我父親大人同細妹,卻係死忠fans。

講咁多都只係想問問大家:家陣資訊發達,訊息繁多之下,我哋睇波嘅資源多左咁多,但係你比以前快樂嗎?

今年做紐迷,真係叫有一場睇一場,落左英冠,以為花多舊零水,買個大台收費台睇喇,點知佢哋唔做喎!頂,可以點?之前仲叫得閒啲,就聽BBC電台直播,搵link搵apps喇,但係世界好現實,英冠賽事嘅資源就係得咁少!工作開始忙,坐喺屋企時間愈來愈少,星期六、日都無必有時間睇波,睇紐記就更家要搵一大餐,結果可能得個桔!最後就好似重返以前未有收費台同網絡世界嘅年代,靠睇啲人嘅share,外國電視台嘅精華片段,止止咳、解解渴咁囉。

今季支持紐卡素嘅人,我肯定少左兩三成,有部份人會轉會支持其他球隊,甚至會倒轉頭,笑紐記打得差,唔係贏晒超班咩?但係紐卡素就係出名多死忠fans,喺英國靠本土球迷購票支持,收入同入座人數,仍然處於歐洲十大之列!只係香港人,太享受勝利嘅優越感,企喺勝利者一邊,會覺得自己都係贏家。無理由撐loser㗎,係唔係先?

莫忘初衷係近期好多人用嘅四字詞語。當初係為左咩成為某某球會嘅支持者?球會歷史?球星?踢波風格?朋友一齊撐?如果你自認係真•球迷,最重要係你記得你無企錯位。就算球會身處劣勢,唔好走開,繼續企;就算球會星散,唔好理、繼續企;球會可能執笠,唔好理、繼續企,甚至加入被錢做股東,成立地區球會時成為會員等等,繼續企。而我家陣繼續企,之後應該都會繼續企。

總結呢個星期紐記兩場贏波嘅重點:

1.古法蘭2.0成功翻生,舒維爾都開發2.0,兩場啲入波都差唔多同佢有關,中場創造力增加,係好事;

2.舒維爾2.0之下,基爾都漸入佳境,已入11球,接過9號波衫,希望有作為喇。而45火爆哥米杜域,就繼續做喇喇隊隊長,坐穿後備席;

3.唔明點解成日都踢高Q大棍英式足球,可以師夷之長以制夷,英冠係玩呢啲,而肥賓真係運轉得唔錯……

Comments

comments