[女子足球]曼城VS伯明翰觀戰紀|空狗愛睇波

Manchester City Women 1:1 Birmingham City Ladies
2016/10/30

尋日睇完曼聯,空狗原本今日好想去伯明翰市睇Second City Derby:伯明翰對阿士東維拉。但揾咗好耐,發覺都係冇可能買到呢場大戰嘅波飛。Check一check schedule,驚覺原來留喺曼市都睇到伯明翰,講緊嘅係伯明翰女足作客曼城女足~

由於機會難逢,空狗決定獻出我嘅女足第一次!又有波睇,又有女睇,一次過滿足哂兩個願望😂😂😂

曼城女足嘅主場並唔係用男足嘅伊蒂哈德航空球場的,而係旁邊嘅Academy Stadium。顧名思義啦,呢個「細場」主要係俾曼城各青年梯隊,以及女隊使用。兩個球場之間,以一條約200米嘅白色大橋連接住。拿,話就話叫「細場」呀,可以容納成七千人(5000坐位加2000企位),多過旺角場㗎😂😂😂

介紹吓女子英超(Women’s Super League) 先啦~ 女子英超其實分兩個級別,最高級別叫WSL1。WSL1嘅9隊分別係鏝、軌、阿妓、猁、伯明翰、諾士郡、新特蘭、雷丁以及唐卡士打流浪。值得一提嘅係,女子英超並唔係好似男子英超咁8月開季5月收季,而係每年3月開季11月收季的~

擁有七位英格蘭女子國腳嘅「藍月亮」,今仗賽前十五戰十三勝二和,其實早喺九月份就鎖定冠軍。但如果今場都唔輸,就能夠複製阿仙奴男子隊03-04球季不敗傳奇,得到”The Invincibles”嘅美譽。

但早於六分鐘,伯明翰就憑一記十二碼打開紀錄。身為曼聯球迷嘅空狗當堂覺得心曠神怡😌😌😌背負住偉大歷史任務嘅曼城及後大舉反撲,左右閘Demi Stokes以及Lucy Bronze頻頻助攻,好明顯睇到呢兩位女將係超班的。我睇緊場波嗰陣係完全唔知邊個打邊個,要一路睇波一路check住wiki😂😂😂果然發現兩位都係英格蘭國腳。

伯明翰方面,偷雞領先一球之後依靠中場Jessica Carter同德國靚女Corina Schroder發動零星嘅攻勢。雖則工作量已經唔多,但曼城門將Karen Bardsley幾有祖赫特嘅派膠風範,短傳又交錯波,接傳中波又甩手😂😂😂
下半場戰情都係差唔多,曼城控制住戰局。空狗越坐越凍,想話行落去買杯熱朱飲吓啦。喺場邊經過嗰陣,就以水平線視角親眼睇住Demi Stokes左路傳中變笠死,追返1:1。有位熱緊身嘅伯明翰後備球員,仲一嘢踢落空狗面前塊廣告牌洩憤,嚇到我呢條毒撚賴屎😂😂😂

70分鐘,曼城換入前鋒小將Nikita Parris以求反勝。此女速度奇高,鼠擾力強。呢個調動立竿見影,Parris入場後令曼城又中楣又食詐糊,搞到伯明翰後防風聲鶴唳。雖然反勝唔到,但曼城女足就以不敗佳績完成呢個賽季。
賽後原來仲有個頒獎典禮。喂曼聯究竟幾時搞返隊女足同noisy neighbour抗衡!?空狗實撐你!

Comments

comments