紐迷週記:球壇吸血鬼——經理人、黑領隊、黑球探!|The Outsider

天氣開始轉涼,大家有無著多件衫?英國東北地區,比南部凍些少,但係球迷嘅熱情從未冷卻。紐卡素一唔連勝之後,星期六再下一城,主場2:1擊敗卡迪夫城,同第二位嘅白禮頓拉開到6分嘅距離。雖然星期日白禮頓贏波又追到落後3分,但係係心理上同道氣勢,紐卡素喺英冠真係無乜球隊抵擋得住。當然,你可以話英冠之麻,有乜咁大不了?強國有句:情願在寶馬上哭,也不願在自行車上笑。我係新特蘭球迷,呢個星期先叫做可以笑一下。預期喺英超掙扎,不如大刀闊斧進行改革。再去英超之日,就係英超東北之王正名之時!

不過勝利帶來快感,亦會令人失去危機感。紐卡素雖然有兩場大勝6:0嘅賽事,但同時大意失波、輸死球呢類情況,真係有唔少。我個人認為中堅拿修斯尚欠火喉,週不時大意之失位令球隊輸波。不過一對中堅,就算點世界級,無一個識睇穿場波格局嘅門將,事倍功半。借走告爾係迫不得已,同時艾利諾就算未傷,佢都絕對唔係大局觀老到嘅門將,更何況初到貴境嘅沙斯同缺乏經驗嘅戴路呢?所以,肥賓要處理失球,係唔係應該由門將開始呢?不過以現時嘅人腳同可供調動嘅人手,就算上返英超,分分鐘都比西布朗、史雲斯或者侯城好揪,之後要睇肥賓點調校喇。

其實今年肥賓操盤之下,球員買賣方面有賺無蝕,過去幾季大灑金錢,但係球會嘅財政竟然可以保持正數有盈餘,真係唔知開心定唔開心。最近又有一個財政龍虎榜出台,詳細就唔講咁多,但係留喺英超嘅中下游球會,好似新特蘭、史雲斯負債驚人但係紐卡素就係賺緊錢。英超有一隊賺到笑,唔使估,梗係兵工廠阿仙奴喇!

雖然球會有錢賺,但係近呢十年有好多收購都係莫名其妙嘅。好似法甲兵艾比特同馬禾,喺法甲踢得少有名氣,但係完全符合唔到英超嘅速度同節奏;利維亞同沙維特,就更加係唔知點解要買,一個「防守型」中鋒,出晒名係進攻終結者,一個就連跟波都跟唔到,明明翼鋒出身,打左一季防中就買返嚟放後備,何苦呢?最令人可惜嘅一對馬賽孖寶:卡比拿同泰奧雲,次個人先後借俾馬賽,之後蝕讓俾人哋(一月泰奧雲鐵定唔會重返紐記,季尾馬賽就俾錢正式收購)。一連串法甲收購都令人火滾,而好多收購都喺柏祖離職前,同法甲一眾球探未被人連根拔起之前發生……

經理人喺娛樂圈好多時令一個名星出名或者身敗名裂嘅關鍵人物,足球圈亦一樣。一億寶寶,其實經理人抽幾多佣金呢?回佣又有幾多?所以好多時啲球員同啲傳媒放風,真係要睇清楚,因為好多時呢班吸血鬼,會假借傳媒嚟炒作,最後向舊球會施壓,向新球會攞錢推球員入市場出售。丙朗你可以唔喜歡佢,但係佢有俾心機練波搵錢;呢型叫經理人或者黑領隊、黑球探呢?佢哋根本就係燃燒球員,靠吸吮球員流出嚟嘅血肉維生,而且活得比所有人好。球壇由呢班人操控,其實同財粗氣大嘅暴發戶球會要搶人不無關係,但嚟想太長趕客,有機會再討論。

下週再見!

Comments

comments