紐迷週記:一年一悼 | The Outsider

星期日紐卡素作客列斯聯,憑著前鋒基爾梅開二度之下,輕取對手2:0,聯賽榜領先白禮頓5分,亦將列斯聯鎖住喺第7位,聯賽榜形勢無變。

比賽過程其實一路捱打,但係列斯前鋒基斯活特多次門前失機之下飲恨。紐記第一個入球相當幸運。中場大腳吊入禁區,眼見門將唔將個波托走而係意圖擒落嚟、中堅又居然無意識護龍之下,一個箭步標前,門將果然甩手之下被基爾快腳篤入。介紹返,列斯門將係前國門羅拔格連。

第二球喺下半場出現,比較有心思,由右路慢慢做傳左三次、安尼達先劏入禁區,基爾喺最適當位置出現鏟成2:0。呢球睇到紐記意圖做多啲進攻嘅鋪排,唔係盲目咁吊上前場,或者任由舒維爾發板。而呢場「佛地魔」都唔算搶眼,水準飄忽始終都難當大任。右後防不論用耶連定安尼達,攻防有序之下唔見失禮,反之左邊都仲係感覺差少少……一對中堅今場發揮平平,龍門戴奴仲係自己表現好,對後防嘅協調仍然乏力,可能性格使然,繼續努力喇!

輪換嘅陣容基本上已經定左,一月唔排除有新球員加盟,但係2016年嘅人腳係咁上下,排唔到入陣容嘅球員,睇嚟應該都係時候借出就借賣得就賣。中場其實人腳係有,兩邊中場/翼位都有正選有後備,真係唔多使再入貨;中場中高碧克每況愈下,大部份球員都係工兵之下,佢都有啲危。迪奧堤上次撻Q定撻訂無法考證,但係一月都應該走唔甩。清走佢哋會唔會係為謝拉特、林柏特留位置?我就覺得未必會,反而借用啲邊緣球員,好似卡巴耶、查理阿當仲靠譜。左後衛有人係有人,但係都仲係差一皮,但係同中堅一樣,咁多人仲買?上返英超先算喇。

最後又到左一年一悼嘅時間。今次作客列斯,令大家悼念逝世名宿加里史必有雙重意義,因為史必生前為呢兩間球會貢獻佢職業生涯最光輝嘅時光,所以比賽嘅第11分鐘係屬於史必嘅(生前嘅球衣號碼)。

其實球員患上抑鬱症嘅分享,筆者都寫左好幾次,但係仍然有好多人球員患上抑鬱症表示不解。球員都係人,只要係人,心理狀態失去平衡、唔健康,就會有唔同嘅心理疾病。好似柏金怕搭飛機,因為怕有飛行意外,無得解㗎、就係驚,你叫佢睇開啲?叫佢做啲嘢、勇敢啲?驚恐症唔係不治之症,但係唔一定醫得好,而且心理病唔係傷風感冒或者斷腳,你做手術喇、食藥喇就會好。有好多人一生都受親人自殺而不能自拔,陷喺自責同創傷症候群之中。

所以每年到左呢段時間,大家都會提起史必,都會點解佢要咁樣離開我哋,其實……真係無其實,大家關心身邊嘅朋友喇。切忌叫有需要嘅朋友睇開啲,唔好叫佢哋努力,陪下佢哋、聽佢哋講乜,已經係最大嘅支持。

Comments

comments