An ugly win (is still a win) | 夕二工八

跌落英冠嘅維拉,喺迪馬提奧擔任領隊期間戰績奇差,布魯士走馬上任後,終於撥亂反正,球隊瞬間重上正軌,主場已經五連勝。

事實上,維拉仍然係踢得唔好,由英超年代積落嚟嘅中場問題仍然存在。不過,布魯士就偏偏可以喺劣勢中贏波,之前作客對住由史譚領軍、主場從未輸過嘅雷丁又好,噚晚主場對住榜下游嘅伯頓又好,維拉都係喺輸控球輸形勢嘅情況下險勝對手。

噚晚場波係維拉史上第一次對住伯頓。維拉呢隊50,000,000+鎊大軍面對兩季前仲喺英乙踢緊嘅小球會,完全佔唔到上風,尤其係上半場,對手體力化嘅踢法加上兩邊快速落底斬中(基本上成個英冠中下游都係咁踢),維拉只係憑僅有嘅一兩次攻門打和一比一。

中場輸曬咩控球輸曬咩,布魯士話唔同你鬥呢啲,我一於擺大個頭,將加特拿同贊迪拿克兩個中場工兵換走,然後將基利殊、佐敦阿休同艾邦拉荷相繼換入,又真係見效喎衰仔,終於喺比賽末段憑上三季都喺英冠平均入20+球但今屆啞曬火嘅麥哥馬克門前建功,取得兩連勝。

英冠途長路遠,各隊實力相差無幾,冇乜可能場場都踢到八面玲瓏激情四射咁款,能夠把握機會以一球半球孖展贏波,其實好緊要。布魯士憑甚佳嘅領導能力,終於帶領維拉超越之前on99炒領隊嘅死敵伯明翰,暫時進佔第十位。但能否超越之後其他隊伍?大佬呀,呢啲梗係之後先知㗎啦,邊有人會話自己已經超越之後嘅其他人㗎?

除咗超班嘅白禮頓同紐卡素、上屆都已經踢得唔錯嘅錫周三同打比郡之外,仲有史譚嘅雷丁、蒙克嘅列斯聯同華拿嘅克打斯菲爾德,三隊都靠出色嘅領隊踢出低成本高效益。七大競敵在前,所以雖然維拉漸見曙光,但要降班後即刻升班,條路仍然非常崎嶇。

Comments

comments