唔係話雖敗猶榮,不過呢隊港隊真係值得寄望 | KH睇波筆記

雖然打足97分鐘都只能夠打和1-1,又一年同省港盃擦身而過,不過我相信大部份嘅球迷都會對今年港隊嘅表現感到滿意。

繼首回合輸2-3不過交出令人驚喜嘅表現之後,港隊今晚喺大球場為大家帶嚟更多嘅驚喜:地面推進嘅進攻、用波有耐性、偶有嘅個人突破,以至失去控球權之後嘅前場迫搶,一眾小將今日嘅表現都令人眼前一亮,即使係現時嘅大港腳都未必交得到呢種表現。充滿活力嘅表現終於令佢哋喺上半場賺到先開紀錄嘅一球:黃俊皓喺右路對手底線附近迫得失誤,隨即由黎洛賢傳中,左翼衛黃梓浩後上入楔頭鎚得手,為港隊喺21分鐘於兩回合追成平手。

另一邊廂,廣東隊喺中場核心盧琳缺陣之下,今場就變陣出擊,嘗試利用身形高大嘅恆大殺手肖智作為進攻重心,透過兩邊嘅傳送敲開港隊防線。雖然肖智對住張志勇可以話係食硬咁濟,不過港隊防線勝在人多,廣東隊攻勢冇乜變化之下,唔算為呢條密集防線製造到好多威脅。

至於比賽嘅轉捩點就出現喺下半場頭10分鐘:廣東隊半場㩒掣換入梅州客家嘅右閘林桔源同效力廣州富力嘅常飛亞,與及首回合有入波嘅梁學銘,未見成效就到港隊出線噩耗。陳俊樂喺一次進攻疑似拗柴,要由胡晉銘入替。雖然話胡晉銘落腳準、傳波都唔差,不過要頂替樂仔去指揮同控制中場就始終差少少。結果幾分鐘之後,一次值得商榷嘅吹罰,就令廣東隊把握到一次罰球嘅機會,由老將汪嵩為佢哋再度取得兩回合嘅領先優勢。

受制於賽前嘅退隊潮,其實港隊落後之下可以換嘅人選都唔算好多,許嘉樂、劉浩霖、方栢倫甚至係擅於後上助攻嘅右閘謝朗軒都已經換咗入嚟 (當然大家可以問點解黃梓浩受傷唔係換陳衍光);林學曦喺前線控波、走位製造機會比起首回合大有進步,不過最後一腳都係差少少;最後連謝朗軒都後上試咗腳幾精彩嘅遠射。可惜埋門一腳都未能製造多一個入波,大家都係要睇住廣東隊拎多一屆冠軍。

港隊絕對唔係冇進步空間:面對住廣東隊呢類硬淨嘅對手,呢班小將同樣都要喺對抗性上再加強;有膽識用波,但係反擊嘅效率同樣要改善,有好幾次反擊都係因為等隊友嘅支援而浪費咗機會。雖然如此,肯用波進攻、肯迫搶,今次港隊喺省港盃嘅落力表現確實係俾到大家驚喜,甚至係對港隊未來嘅希望。希望呢班小將嘅所屬球會都能夠喺本地賽事繼續俾機會佢哋成長,假以時日,我哋應該可以見到佢哋接棒,代表港隊出戰國際賽。

(圖片來源:香港足總)

Comments

comments