【英足總盃觀戰記】曼聯vs雷丁|空狗愛睇波

2017/01/07
Manchester United 4:0 Reading
其實追波睇真係洗多好多錢,小空狗明明只係飛個London,咁你明知曼聯有波踢,唔通你又忍心唔睇咩?😂😂😂咁樣搭一搭火車又冇幾廿鎊,返到香港一月九號又要交稅俾個仆街政府,逼迫你個龍的咚。

然後行入球場嗰陣會經過好多攤檔,好鬼多精品賣,通常又要放低幾兩銀。今次專登去吓Manchester United Supporters Trust個檔口睇(買)吓嘢~ 呢個信託基金,意在增強球迷喺球會發展方向上嘅影響力,長遠嚟講甚至想收購球會,總之話俾班吸血鬼(aka格拉沙家族)知:球迷先係球會嘅命脈!咁呢啲咁有意義嘅事,空狗作為一條真獌就梗係要支持啦。

今場魚拉突做咗好多輪換,羅美薇細佬羅美路終於有得出,楊格打個右閘位,連爆炸頭同朗尼都正選。而雷丁方面就有史譚同Tylor Blackett返嚟。一開波曼聯就㩒住嚟砌,分半鐘已經兩次攻門,十五分鐘已經二比零,其中朗尼打開紀錄嘅一球,更加追平Sir Bobby嘅球會入球紀錄。
雖然史譚球員時代係鐵衛,但佢所執教嘅雷丁,防守嘅表現就不敢恭維啦……佢地對曼聯嘅進攻球員太過仁慈,埋身埋得慢,企位又鬆散,Martial同福仔多次喺兩邊作個人突破然後cut in俾朗尼同馬達。如果唔係福仔浪費咗個單刀,上半場可以贏得更多。


估下史高斯後邊果位係邊個?

下半場戰情都係差不多,雖然雷丁控球率增加咗但作為唔大。但我想講吓Daley Blind,我冇識波牌,但我真係覺得Blind唔應該再打後防任何一個位置。呢位人兄冇身型冇頭鎚冇速度,打左閘俾人一推就爆,打中堅又唔夠人頂。其實將防中出身嘅佢放喺後防度,對佢都係唔公平。我自己就好希望佢回歸中場接替卡域克嘅位置,呢啲逗住逗住嘅踢法咪啱佢囉!你叫佢衝撞同衝刺,即係玩尻佢啫!現場有唔少球迷成日恥笑爆炸頭,我就不嬲係佢打手,覺得佢冇啲人講到咁冇價值、咁「唔配曼聯」。喂,爆炸頭衰極都有飯頭鎚同身位丫!我叫你唔準諗即刻講一個Blind嘅優點,有冇?😂😂😂


識睇,一定係坐喺Stretford End睇!

老實講今場波可觀性就麻麻,不過有得睇久違了的小豬😭😭😭,都算幾開心~~~

Comments

comments