傳承真正曼聯精神的球隊——聯曼觀戰記|空狗愛睇波

FC United of Manchester 2:2 Harrogate Town
2017/01/21

曼聯今週作客城篤史,除咗食黃牛都冇乜辦法買飛㗎啦…但唔緊要,睇唔到曼聯咪睇聯曼囉😂😂😂

主場Broadhurst Park

半職業賽事都有場刊賣㗎~

早排先略略講過Manchester United Supporters Trust反對格拉沙家族惡意收購曼聯,所以籌款揾機會反收購。咁表態都有好多種方法嘅,另外一班真心曼迷,就決定成立一間新嘅球會實踐理想,而個理想就係…球迷最大,個個都係老板!只要付出每季12鎊嘅會費,你就有球會嘅決策權:想默默參與嘅可以淨係喺啲議題上投吓票;多啲諗頭嘅又可以喺大會度提出吓動議,睇吓點改善球會發展;再投入啲啦喎,每年揾到5個會員嘅endorsement,更加可以寫政綱參選董事局。總之唔怕你嘈,最怕你唔嘈😂😂😂

聯曼現時身處第六級別聯賽National League North嘅中游位置,同一聯賽仲有Salford City,即係華倫西亞個新加坡腦細Peter Lim,夾埋傑佬、史高斯、尼維利兄弟同畢特聯合擁有嗰隊波~ (題外話:本港時間年初二,聯曼就會喺主場迎戰沙福城,上演小曼徹斯特打毗。媽呀我超想睇,肯定勁好氣氛!) 至於今日嘅對手,係排名僅高一位嘅Harrogate Town,估計兩隊應該實力相當。

主場Broadhurst Park喺2015年開幕,容納到四千幾人。可能冇乜外來人會專登入嚟,空狗入到去得到大家友好嘅禮遇~ 買場刊嗰陣個嬸嬸又同我傾計啦、影影吓相又有人同我握手啦,仲有坐底揾緊wifi嗰陣(係呀球場有free wifi)都有位叔叔走過嚟同我介紹吓邊度有嘢食有嘢飲咁,感覺好好呀😊😊😊

因為呢度人人平等,所以領隊個位同觀眾一模一樣。

大家屎忽都未坐暖,Harrogate Town兩分鐘就憑一個角球攻勢頂入😨😨😨 佢地嘅隊長,身穿7號嘅右閘球員出波鬼咁靚,對一對聯曼嘅中堅構成巨大壓力。而聯曼方面呢,進攻重任就落咗喺10號左翼,好波之人Jerome Wright身上。咁啱我坐嘅位置就係近聯曼嘅左路,所以上半場可以近距離欣賞兩位隊長嘅match-up,都幾好睇㗎~ 不過聯曼27分鐘扳平嘅一球係嚟自右邊嘅配合,右閘球員乘Harrogate後防一下唔集中,交由無人看管嘅前鋒Jason Gilchrist射成1:1。

由於我坐嗰個係路口位,啲人又係咁出出入入搞到右邊賓周冇得住 (左撚住哂),下半場又係一開波,我就喺淨係見到其他人嘅背脊同屎忽下,聽到Harrogate Town又快手領先😤😤😤論整體質素聯曼始終低對手少少,雖然好努力組織攻勢,但有實質威脅嘅就唔係好多,反而Harrogate Town嘅轟炸仲有睇頭。但聯曼喺75分鐘,又憑George Thomson禁區頂一個冷箭追返掀起高潮。臨完場前嗰五分鐘好鬼刺激,Harrogate Town頭鎚俾41歲巴西門將Adriano Basso僅僅救到,補時階段聯曼一次突擊右路傳中俾伏兵遠柱嘅球員撞入反cup!全場二千幾人high到震,小空狗以為連聯曼都有Fergie Time咁勁之際,就發現原來旁證支旗扯到行一行,越位:0) 咁冇啦,最後各二打和~

高登&連登季經問題:「長傳急攻=踢法守舊?」,我今日就真係見識到乜嘢叫做真正嘅高Q大棍英式足球。兩邊瘋狂互炸,個波真正喺個天度多過喺地,我有一刻覺得自己睇緊網球,睇完波條頸唔好講笑都有啲冤😂😂😂全場節奏好快好快,啲埋身肉搏好激烈,我覺得好睇㗎,氣氛又正~ 大家係咁唱聯曼同曼聯嘅chants😂😂😂


未試過可以咁接近場區~~~

經過今次,我好似有少少鍾意咗聯曼…Broadhurst Park,我會再返嚟㗎!


預備組教練,兼全世界最悲情細佬……

Comments

comments