紐迷週記:manager | The Outsider

紐卡素自足總盃第四圈意外大敗3:0俾牛津聯之後,聯賽兩勝兩和,幾場波嘅共通點:球員發揮平平、鋒無力、後防出事。排除門將戴路派膠,基本上紐記「發揮正常、無穿無爛」。聯賽過半有多,升班已無懸念,習慣坐過山車嘅紐迷,今季咁穩定真係頂唔順(誤)。不過肥賓入主以來,連勝一輪、回下氣,繼續輪換繼續贏波,上返英超都咁穩定我又唔拘。

一月真係好悶,唯一有趣嘅係傳出肥賓同肥佬決裂。呢個傳聞唔夠兩日,就由肥賓親自解畫,危機解除。紐記老闆鍾意插手搞球隊,由上任班主到而家肥佬年代就好似傳統一樣,肥佬仲成日俾人傳佢用轉會費豪賭添(安祖卡路爾填數事件)!季初由肥賓操盤,Managing Director Lee Charnley(光頭陳)接order照做。但係一月光頭陳接連幾筆中場、翼鋒轉會都搞唔掂,令肥賓好無癮。有人話係肥佬閂水喉,季初賺左唔想用;同時水晶宮、愛華頓獅子開大口,想賺多幾百萬,情願deal唔成都在所不惜,一月買唔到人,都有客觀因素。所以傳聞就此不了了之。

但係好多球隊都仲係行緊領隊負責制,好似水晶宮、新特蘭呢類球會,領隊基本上大權在握,好多英人領隊習慣一人話事,好處就係夠機動,領隊人脈夠真係可以救球會於一命。但係都有例外,好似西布朗嘅佩利斯,好明顯就控制唔到轉會嗰part,你見佢某幾個球員就係唔用、唔想用就知喇!如果講一人負責制最出色,就首推退休爵爺費格遜是也。當年運籌帷幄,買人賣人都令人拍按叫絕,最重要係有成績撐腰。後來者食屎關佢鬼事!

佢老對手雲加呢期就頭痕,事關佢面臨十幾年如一嘅劇本被人要求修改,而且一改可能連導演之位都被cut!雲加多年以嚟,以小本大利、蔗渣價錢燒鵝味道見稱,多年前四(唔係年年第四)出席歐聯淘汰賽嘅輝煌戰績聞名於世。如今被人挑戰佢權威不特止,仲被要求下台,顏面何存?

正經講,歐洲大陸主帥係Head coach,唯有英格蘭叫manager。足球潮流不停滾動,英式嘅足球生態應唔應付到個變化呢?要求manager要有管理能力,同時又要識教波,喺愈來愈趨向專業化嘅世代,係唔係要作出改變呢?阿仙奴有今日一定因為雲加,但係戰術落後就係成班教練團要負責嘅問題。當年費爵爺都換過好幾代嘅教練團,呢樣係兩者最大嘅分別:放手不放手嘅問題。

紐記呢方面我完全唔擔心,在戰術角度上,肥賓仍然係主流教練中嘅前列份子,無plan B嘅問題除左無人可以用之外,更仲要係現階段連plan A都仲係操練中,穩定性同信心都仲建立中,搞咁鬼多做乜,專心踢波喇!至於光頭陳俾唔俾到人肥賓用,下季再算喇。

#紐迷週記 #陳沖 #TheOutsider

Comments

comments