賽後筆記:南區vs流浪;東方vs富力 | KH睇波筆記

琴日東網直播兩場港超,雖然近期學業繁忙,不過難得有咁嘅機會,都要邊做邊睇嘅:頭場冠忠南區作客理文流浪,雖然有基奧上半場先開紀錄,不過下半場進攻乏力之下,最終被對手喺末段由黎耀昌門前補中,被逼和1-1。至於尾場,東方龍獅遠赴小西灣迎戰R&F富力,部份主力輪換之下,依然憑住洛迪古斯、鄭少偉、基奧雲尼同埋李嘉進嘅入波,以4-0輕取對手。

首先講下頭場,陸志豪受傷其實對於冠忠南區嘅影響都唔細:前幾場冠忠南區正選用外援嘅套路都係後防用上加拉度同杜馬思穩住防線,另外再加上前線負責停球嘅馬高斯,同埋突破力強嘅蘇沙;中場串連組織嘅工作,正選往往交俾陸志豪負責,有戰術需要嘅時候,先會用內田智也或者迪基圖後備入替。

今日陸志豪缺陣,冠忠南區嘅中場就要用內田智也踢正選,邊路焗住先收起蘇沙用基奧,進攻上難免有折扣。加上內田智也發揮機會不多,馬高斯喺前場停球發揮唔到應有嘅作用,入球功臣基奧亦都只係踢咗半場好波,冠忠南區今日喺進攻上嘅表現確係令人有啲失望,下半場更加係穩守有餘,進攻上就乏善足陳,最終為末段失波埋下伏線。當然對佢哋而言,今日傷出嘅謝德謙縫針並無大礙,已經係不幸之中嘅大幸啦。

至於理文流浪,貧攻一直都係佢哋嘅問題,即使後來用埋葉頌朗同黎耀昌兩個後備,都未能夠為球隊嘅進攻帶嚟好多變化,最終都係要靠死球先可以追和。而後場方面,雖然大致上發揮都叫穩定,不過平時踢一腳波都穩陣嘅趙俊傑今日都偶爾出現咗啲幾嚴重嘅失誤,不禁令人捏把冷汗。今場拎返一分之後,其實佢哋餘下嘅賽程仲有傑志同東方龍獅要對戰,加上再戰冠忠南區嘅補賽,位於中下游嘅佢哋仲未可以話完全安全。

去到小西灣嘅尾場,東方龍獅週中同川崎前鋒激戰之後,都收起咗麥基、白鶴同米曹等主力,由曾至孝、吳偉超同鄭少偉等副選,夥派美路史拿域、基奧雲尼等未有註冊亞冠盃嘅外援一同迎戰R&F富力。開賽初段比較慢熱嘅東方龍獅,面對R&F富力有紀律嘅壓迫防守確實未見啲咩甜頭,只有基奧雲尼一次頭鎚攻門同埋個人突破比較有威脅,直到上半場末段先由洛迪古斯接應角球頂入,打破缺口。

隨後東方龍獅先後換入勞高同埋迪高,入替受傷嘅洛迪古斯同埋中場嘅美路,就馬上見到「雙高」對於球隊而言係有幾重要:呢對中前場嘅支柱組合一出,東方龍獅馬上由迪高控制返中場;勞高嘅串連亦都令到中前場更為活躍。加上R&F富力喺下半場嘅專注力有所下降,鄭少偉同埋基奧雲尼就喺10分鐘之內連入兩球,鎖定戰局。最後東方龍獅亦有後備入替嘅李嘉進遠射破網,錦上添花,以4-0再次大勝一場。

以東方龍獅嘅陣容深度 (當然亞冠又係另一回事) 同穩定性 (穩定又唔代表一定好好睇),其實要應付本地賽事其實真係冇咩問題。只要保持宜家嘅走勢,冇咩閃失的話,佢哋喺最後一場迎戰傑志之前,相信喺積分榜上領先嘅機會都唔細。

(圖片來源:香港足總)

Comments

comments