運動嘢開倉‧打錨記 | Open Box 開箱

今時今日,香港零售業嘅寒冬,買嘢有折是常識吧!今次介紹下本Box最愛嘅運動嘢。租金貴到HIHI嘅香港,唔止759等連鎖集團,連運動嘢都成日開倉,個個都話自己「真.究極.堅抵HI.波鞋開倉」,係咪「__假期」同「__生活」介紹嘅就係最抵HI?本Box今次又同大家睇睇喺重慶大廈地庫嘅打錨之旅!

打錨一:波衫練習衫過季款多

本Box今次就去到重慶大廈地庫睇睇,低至四折起?開出嚟見我!一入到去見到一大堆足球嘢,舊款波衫練習衫:A米練習衫、瑞典/日本/德國/俄羅斯/比利時練習衫、仲有好多款波褲,HK$250/4件,圍返HK$62.5件,性價比嚟講過得去啦,落街玩波著都Ok 嘅!至於波衫:紐約紅牛、漢堡、德國作客女裝、祖記、皇馬就連亞軍庭都有,三四舊水左右有交易,有現季款有過季款但無得印埋字,抵HI指數唔算太高本Box當然無入手啦!

打錨二:adidasnike new balance波Boot都有

唔追款的話本Box都覺得呢度D Boot還可以,特別係畀D唔係成日踢嘅朋友仔,另外本Box發現有埋波Boot界嘅新丁New Balance(其實都唔新,2015年到而家),感覺係貼腳嘅,想試嘅朋友仔平平地買返對試試都可以。

後續:其實香港地踢波,7人場多數都係硬地(有D做係馬路地添),11人就係人造草、仿真草同真草。相信踢開波嘅朋友仔都見識過香港嘅球場:人造草即係地毯但長期噴水,跣Q死你;仿真草膠粒都已經去得七七八八,得返沙嘅場大釘真係塞得入?;至於真草已經淪為沙場,情況同缺乏保養嘅仿真草場不太大分別 (遲下再講香港地嘅球場系列),所以本Box會推介短D/淺D嘅釘Boot。

打錨三:平常心去睇其他款

老老竇竇款就唔算特別靚,唔好期望有D NMD Sock Dart 247同Basket Heart出現,畢竟開倉都係清下貨同埋一分錢一分貨,咁但係全無可取?又未必嘅!隨手一影都有D AirMax、574/996同Boost可以一戰,三舊水買嚟孝敬下老人家都不為過。

如何拆解「騙案」:低至__折「起」!?

為咗吸引貪心的小狗們眼球,不論咩嘢行業,十個有十一個開倉都係講自己低至X折「起」!呢個起字就犀飛利咯,一隻字仔就可以令全個場只得一款貨係得X折。宣傳品通常就係放咗D最抵HI嘅貨,通常數量唔多,另外場內都有機會打錨到其他抵HI貨品嘅,親手去睇睇就最好!

不過,計本Box話齋,每對鞋係大家心目中都有個價,如果只係想求其是但著上腳唔要求追Fashion的話,只要大家覺得順眼值租都不妨考慮一下……

Comments

comments