紐迷筆記﹕權鬥與轉會 | The Outsider

大家好!喺新球季,《紐迷週記》將會改名為《紐迷筆記》,一嚟咁大篇難處理,二嚟唔想大家都睇得辛苦。希望關心紐記嘅朋友繼續支持呢個欄目!

關於權鬥

不經不覺又到開季既時間,紐卡素嘅職球員好多都已經陸陸續續咁重返訓練場上。上季好唔容易後上封王,但係區區一個英格蘭冠軍聯賽錦標,絕對唔係紐記嘅目標,重返英超賽場,先至係東北之王所想望既事。不過轉會市場一開,轉走既竟然係球探主管卡爾(Graham Carr)。卡爾曾經帶來不少法籍好手,同時僱傭兵都不少。上季肥賓喺一月轉會市場上,曾經因為引援不力,而同班主「肥佬」艾殊利同埋「光頭陳」燦尼嘈過一次大交。當然,事後無引發肥賓離職,應該同肥佬安撫佢有關,而成件事嘅代罪羔羊就係卡爾。

卡爾之前同肥賓其實無口齒印。傳聞紐記係有一條不簽26歲以上球員既規矩,卡爾一路堅持路線,只係肥賓希望可以打破慣例,始終英冠經驗唔多,有隻識途老馬會穩陣啲,所以協商之下,最終簽左迪美(Mohamed Diame)同埋戴利梅菲(Daryl Murphy)。可惜隻鑊始終要有人孭,光頭陳就出刀斬低卡爾,搵左21歲以下球探史提夫歷克臣(Steve Nickson)頂檔。但係留意,卡爾個職銜係球探主管(Head Scout),而歷克臣既職銜係招聘主管(Head of Recruitment),會唔會因為咁加大左肥賓權力,就要睇之後嘅發展。

轉會消息與傳聞

科利安利祖尼(Florian Lejeune)
利祖尼已經以 £8.7M轉投紐卡素。呢名26歲、出生於巴黎嘅法國球員,效力過維拉利爾B隊,曾為維拉利爾上陣過5場賽事(降班期間)。又曾經踢過來季升上西甲、被城市集團收購嘅基羅納(Girona)。雖然佢曾經被曼城收購過,但係一場未出之下又借返基羅納。16-17球季效力伊巴(Eibar),未見非常突出,但身高1.88米既利祖尼,應該係肥賓飛甩卡爾之後嘅首宗收購。球王片就無,伊巴輸俾巴塞隆拿0:4嗰場,佢有份做「主角」……

基比斯(Kieran Gibbs)
兵工廠青訓出品既基比斯愈踢愈沉,除左同蒙維爾爭正選失敗,近一兩季見到佢有啲迷失,究竟係佢未具踢大球會嘅心理質素,定係佢本身唔夠料踢呢?如果命運能選擇,佢離開阿仙奴轉投紐卡素又如何呢?左路一向缺乏屏障嘅紐卡素,除左杜美特之外,差唔多無左閘咁滯,傳聞兵工廠索價£8M……27歲英格蘭邊緣國腳既基比斯,算唔算貴呢?

巴甘布(Cédric Bakambu)

法國出生、曾經係法國小國腳(U18、19、20)既巴甘布,最後喺2015年轉籍剛果民主共和國。出身索察,14年去左土耳其貝沙(Bursaspor )搵食,27場入13個波。15年轉投維拉利爾至今57場入23個波。球王片中嘅佢多數喺禁區裡面搵食,有腳下功夫同段速,有射門觸角,不過就唔見佢千里走單騎式既入波,創造機會能力未睇到。外型同風格都係好典型法式非裔前鋒(有啲拿卡錫迪…..當然差好遠……)。韋斯咸報£22M都被拒絕,紐記要入手應該要打破封塵已久£17M買奧雲既紀錄……

Comments

comments