紐迷筆記﹕轉會愛回家 | The Outsider

講講轉會消息先,英格蘭小國腳積及梅菲(Jacob Murphy)由諾域治(Norwich city)以約1250萬轉會加盟紐卡素。

積及梅菲係諾域治自家產品,先後外借幾間低組別聯賽隊伍,15-16球季外借甲組高雲地利(Coventry City)表現優異,全季上陣42場有10個入球。16-17球季諾域治不幸降班英冠,積及梅菲回歸球隊而且成績唔錯,連盃賽踢左40場波入左9個入球。而出戰U21歐洲國家盃打後備,亦都有1個入球進帳。司職右鋒嘅積及梅菲同時可以充任前鋒同進攻中場,身高175cm(好多網站話得173cm)、67kg,身材稍為瘦削左啲,相信上到英超要增下磅。而根據transfermarkt.co.uk嘅標價,積及梅菲只係值85萬鎊,但係紐記就用左1250萬鎊買佢返嚟,以肥賓買人嘅眼光,應該有唔錯嘅發展潛力。最後一提,本身積及梅菲仲有一個孖生哥哥祖舒積及(Josh Murphy)踢緊諾域治,積及家族就出身蓋茨黑德(Gateshead) ,積及梅菲自細就支持紐記,所以今次轉會成功佢都表現興奮。

紐記收購左基斯甸艾素(Christian Atsu)同利祖尼(Florian Lejeune )之後,大家都等緊第三簽,之前都同大家講過好幾個傳聞,但係差不多無個中。最新嘅傳聞係之前外借去過利物浦、新特蘭嘅西班牙右後衛查維文基路(Javier Manquillo)。馬體會青訓出品,年少成名嘅佢而家先23歲,但係就已經被馬體會放棄,transfermarkt.co.uk標價已經跌到340萬鎊。傳聞佢已經去左愛爾蘭都柏林同紐記會合做體測,仲有人出過佢著紐記嘅練習衫嘅相,不過一日未官宣好多嘢都唔可以作準。(編按:文章刊登之日,文基路已落實加盟紐卡素)

最後想講下波衫。125年週年紀念,其實真係唔容易,一間球會做到百年老店,點都應該賀一賀佢。點知人家利物浦現復古,主場作客嗰兩件衫靚唔靚就各花入各眼,起碼有誠意先。紐卡素呢?唔理咩天堂呢筆唔理先,除左個球會徽章加左兩條棕枝之外,不論主場作客都求求其其咁、好似自己組隊啲衫咁!叫好睇啲嗰件第三作客,都只係老虎牌宣傳策略全球黑先有啲睇頭。網上傳聞嗰件深藍紫紅橫間作客,如果真係推出,我第一個買!今年紐記嘅波衫,真係兩個字﹕好X差!

Comments

comments