英冠前瞻 | 夕二工八

分組點評一下先~

英超降班組
米杜士堡、候城、新特蘭

加盟新特蘭的McGeady

米杜士堡重臣Ben Gibson拒絕英超各隊邀請留隊,這份喜訊為球隊注入強心針。

米堡一口氣買入三個前鋒:Assombalonga、Braithwaite及Fletcher,合共轉會費超過三千萬, 再邀請到年輕少帥蒙克從列斯聯過檔,務求要以最快嘅速度重上英超,而佢哋亦輕易成為升班太熱。候城高價放走Harry McGuire同Andrew Robertson俾英超球隊,又低價賣埋Huddlestone同Elmohamady俾同級球隊, 元氣大傷,要再次升班有一定難度。新特蘭則甚有愛華頓燒鵝B隊嘅味道,再次借入後防Galloway同Browning,買入翼鋒McGeady,就算喺英甲貝利收購嘅James Vaughan,其實都係 愛華頓青訓出身。上季外借嘅荷蘭國腳Jeremain Lens好大機會離隊,不過以新特蘭現有嘅人腳,要躋身前六應該不成問題。

英甲升班組
錫菲聯、保頓、米禾爾

熟悉英冠的朋友必定認識錫菲聯新援Billy Sharp。

錫菲聯以一百分升班,比第二嘅保頓多出足足十四分!前鋒Billy Sharp早已喺低組別聯賽成名,加上回歸賽場嘅爭議性射手Ched Evans,而且中後場質素平均,「The Blades」絕對有能力與列強周旋。保頓同米禾爾得以升班,歸功於其他球隊嘅屎甚於自己嘅勁,不過升到班就係神仙,上到嚟拼落英冠下游球隊度又唔覺特別差喎,保頓喺今個free transfer執到唔少好嘢;米禾爾雖然只係執到啲無名小卒,但出名爛打嘅佢哋合作性極強,能否拉一眾強隊落嚟打泥漿摔角,頓成英冠今屆一大看點。

上季的前列線
雷丁、錫週三、富咸、列斯聯、諾域治、打比郡

富咸人腳齊章,是來季升班分子。

上季由史譚帶領嘅雷丁差啲以悶西波悶到上英超,不過史帥早已對缺乏買人資金作出投訴,相信佢比其他球隊撬走係遲早嘅事,到時其實人腳唔強嘅雷丁亦都會隨之而崩潰。錫週三嘅前場人腳豪華,但如果無法改善後防,睇怕佢哋仍然只係會與升班擦身而過。富咸係筆者來季升班嘅星級推介,利物浦目標Ryan Sessegnon、「新卡卡」Lucas Piazon等逐漸成長,只要新加盟嘅前鋒Aboubakar Kamara表現對版,相信富咸可以取得直接升班資格。列斯聯、諾域治同打比郡三隊人腳都不俗,三隊亦同時換帥不久,新領隊嘅表現,成為咗佢哋能否喺今屆躋身季後賽嘅關鍵。

中部華僑城
阿士東維拉、狼隊、伯明翰

維拉有經驗豐富的泰利助陣,戰力提升。


狼隊招攬波圖的FM妖人Ruben Neves。

復星集團嘅狼隊,上季高價喺葡超買人但搞到幾乎降班,今季痛定思痛,決定……繼續高價喺葡超買人!喺超級經理人Jorge Mendes嘅引線下,狼隊竟然可以簽入新星Ruben Neves、鐵衛Miranda同Willy Boly;又從西甲馬體會借來潛力優厚嘅小將Diogo Jota,free transfer度仲要執埋諾域治嘅門將Ruddy同後衛Ryan Bennett,咁嘅陣容,都咪話唔嚇人。上季豪洗七千萬鎊嘅維拉,老闆夏建統今季話要緊守Financial Fair Play,所以唔會點洗錢喎,只係低價從史篤城簽入韋倫,同埋免費簽入泰利同森巴。呢個過百歲嘅草蜢級中後場組合,竟然獲得眾賭波公司青睞,將上季排第十三嘅維拉捧為今屆奪冠次熱,唉我真係唔識講。至於港資伯明翰,舊年喺老人院揾到哈利列納出山打救,終於成功護級,今季暫時只係簽入白禮頓門將Stockdale同班士利大隻仔Marc Roberts,睇嚟老納有排頭痕。

中游風流波
賓福特、普雷斯頓、卡迪夫城、班士利、葉士域治

上季EFL Young Player of the Year:Ollie Watkins

賓福特啲波好鬼爽,有前無後打死罷就,上季入波仲多過升咗班嘅白禮頓,今季仲買入上季EFL Young Player of the Year嘅Ollie Watkins,務求繼續勁射英冠!普雷斯頓就免費執到曼聯小將Josh Harrop,能否喺次一級聯賽發光發熱,令人期待。
班士利將骨幹Hourhaine、Bree同Marc Roberts相繼賣走,卡迪夫城今個夏天冇同Le Fondre及Whittingham續約, 葉士域治則免費放走後防大將Berra,三隊皆有向下流之勢。

下游打大交
諾定咸森林、伯頓、昆士柏流浪、布里斯托城

屢屢賣盤不成的森林來季可否站穩腳跟?


布里斯托城冇咗星級借將Tammy Abraham,唯有背城借一,以破球會紀錄嘅五百萬磅(好多㗎喇佢哋嚟講)從法甲昂熱購入前鋒Famara Diedhiou搏一搏。諾定咸森林上季僅以尾四衝線,經歷眾多人事變動之後今季希望可以喘定,但相信仍然難以短時間內重拾昔日歐洲班霸本色。深陷財困嘅QPR能否繼續刀仔鋸大樹;伯頓嘅低薪價全英人442高Q大腳究竟可唔可以又捱多一季,同樣值得留意。

總結

英冠一向難估,尤其上季赫德士菲奇蹟升班後,喺前列留低好幾隊實力雄厚嘅喺度角逐,預計兩三隊放領嘅情況唔會再出現,取而代之嘅會係群龍無首嘅情況。

榜下游情況相近。伯頓、昆士柏流浪、葉士域治等積弱已深,保頓同米禾爾又基本上弱陣升班,再加上每季都總會有一兩隊牌面幾好嘅會無故失準,有十隊八隊要護級其實唔奇,甚至到最後一輪都仲會有五六隊會面臨降班!

英冠,星期五深夜兩點九開波!

Comments

comments