FIFA18 前瞻 #2 ── 何謂 5* Skill Moves? | 蔣美葉

對於從來未接觸過 FIFA 嘅人嚟講,可能唔知 WF 同 SM 加幾粒星代表乜。好簡單,WF 即 Weak Foot (逆足),SM 即 Skill Moves (花式盤球),越多星越好。據網上職業玩家解釋,逆足達五星嘅球員,雙腳都可以射出同等力量、弧度等嘅射門;至於五星 Skill Moves,則可以出齊所有花式技巧。

不少 FUT 玩家都把雙五/雙四星嘅重要性,放喺單純追求高 OVR 之前。故每年 #Top100 名單令人期待,五星 Skillers 同五星逆足球員亦教人趨之若騖。

昨日 FIFA 18 五星 Skillers 終於落實出爐,除咗一班常客如尼馬、C朗、普巴、哥利斯尼、賓艾化外,現役五星 Skillers 今集重多咗葡超新貴謝臣馬田斯 (Gelson Martins)、多蒙特新簽嘅耶莫蘭高 (Andriy Yarmolenko)、效力波圖嘅阿布巴卡 (Vincent Aboubakar) 等。另外,亦有少量球員被「摘星」,如巴西新貴古里安奴 (Giuliano) 同迪亞歷辛度 (D’Alessandro) 得返四星 Skill moves。

特意指出「現役」兩字,因為 PS4 今集終於有 Icons 球員 (即 Legends 球員) 可用。而 Icons 嘅五星 Skillers,上集嘅比利同奧高查係 #FUT18 繼續五星,今集新登場嘅馬勒當拿同朗拿甸奴亦都成為五星 Skillers,屆時一眾 FIFA 玩家事隔兩年可再次控制細哨使出牛尾巴 (Elastico)。但可有發現,在比利、奧高查、馬勒當拿和細哨四人之外,少了一名 #外星人 ── 真‧朗拿度?

能被世人稱為外星人嘅大哨,無論射術、控球或盤球等技術都很肯定無容置疑。即使職業晚期因怪病纏身而害得肥腫難分,仍無阻球迷對佢嘅「神化」。其生涯初期效力 PSV、巴塞、國米等「屈機」片段至今仍常常被廣大球迷輯錄成集,#開心share 出嚟讓大眾回味一番,其妙到毫巔嘅腳法因此更見一斑。但當昨日見到作為最貴版 ── 即 Icons 版,盛惠港幣 $699 ── 封面人物嘅大哨,未有被 #EASports「祝福」,只獲雙四星設定,隨即惹來一眾球迷為大哨抱不平!

而我不禁嘆問,究竟 EA Sports 有無睇過外星人踢波?

Comments

comments