球證走漏眼 x 中堅出錯 | 蔣美葉

猶記得,當利物浦開季被屈福特迫和 3:3 後,加歷查狠批紅軍白白浪費了季前集訓,因為防守漏洞問題依舊存在 [1]。

當占美列納回應時,指利物浦理應收購雲迪克 (當時仍未踏入九月) 以解決防守不濟嘅問題時,加歷查霎時發難,直指紅軍防守問題不能單從透過收購雲迪克便解決,而在於兩閘企位太闊,中場亦因應高位壓迫嘅踢法而企得太出,如此佈局排陣等同將防線上最後一道屏障 (即一對中堅) 長期暴露於人前。

加歷查呢個論調,無疑同高普幾日前喺歐聯賽後講嘅一番話不謀而合。

亦喺對陣般尼當日前,夏格維斯喺英國 BBC 5 台開咪 ,指利物浦今日嘅防守問題,即使簽下巴里斯、馬甸尼都唔能夠解決,因為利物浦今嘅體系對一對中堅所提供嘅保護少之又少。

既然問題已經被多方不同人仕再三討論及分析,加上高普亦指 VVD 加盟唔係最佳解決方法,換言之,即係高普開始意識到球隊企位 ‘so high and wide’?

坦白講,主場失分俾般尼,確係好唔好受;當知道今次係般尼自 1974 年以嚟,首次喺晏菲路攞到嘅第一分,更加心都埋 up 埋一舊… [3]

撫心自問,般尼防守確係非常出色,但利物浦進攻亦不見失禮,無論小組短傳入滲、落底或K角位斬中抑或禁區頂施射,為破大巴,可謂咩武功都出齊。當中以由史杜列治策動,以米拿半車身射門被擋出作結一球嘅攻勢最為令小弟留下印象。不過每當失分,球迷,不論利迷與否,都容易將焦點放喺失敗/負面嘅一面,所以賽後最多人提及嘅係古天奴連續三次浪射又或者蘇蘭基嘅運滯,而鮮少人提及上半場沙拿禁區內被侵犯未有獲十二碼所埋下嘅「禍」。

(當昨日睇多蒙特,多蒙特透過 VAR 補吹返球十二碼,又不禁嘆問點解英超重未有 VAR。)

論防守,除咗失嘅一球 TAA 都有啲責任,其他驚險鏡頭其實都係嚟自卡雲拉一人釀成。上面提到,高普是否開始意識到企位 ‘so high and wide’?睇下今場用羅拔臣取代企位太出嘅摩蘭奴、對抗性較強嘅安利簡取代喺中場對一對中堅保護不足嘅軒達臣同用較多跑動嘅米拿取代狀態飄忽嘅韋拿杜姆,都可以清楚見到高普願意就著眾人口中嘅弱點去變。不過,既然大部份問題又係個別中堅造成,仍可抱「買中堅於事無補」嘅論調嗎?我諗加歷查好快都會改口了。

[1] www.liverpoolecho.co.uk/sport/football/football-news/jamie-carragher-virgil-van-dijk-13468372
[2] www.burnleyfootballclub.com/news/2017/september/liverpool-v-burnley/

Comments

comments