開季不似預期,東方龍獅爭冠路注定難行 | KH筆記

上季最後一場以1-4不敵傑志,無緣衛冕港超聯冠軍。今年東方龍獅重新出發,喺司徒文俊接手之後,再度挑戰港超聯冠軍寶座,點知落筆打三更:先喺揭幕戰以0-1不敵傑志;隨後主場迎戰和富大埔,領先一球之下反敗1-3;上星期五作客新軍理文,以2-3再輸一場。本來被視為爭標份子,宜家就三戰全敗敬陪末席。回顧呢三場嘅表現,其實東方龍獅最大嘅問題係:老化,同埋冇乜變化。

https://i1.wp.com/cdn.hk01.com/media/images/792821/xlarge/991a8154d5208b6c11b20c794f880e45.jpg?resize=694%2C461&ssl=1

翻查東方龍獅呢三場正選嘅平均年齡,分別高達28.5、29同埋30歲。年齡高本身未必係問題,但係東方龍獅班球員係睇得出真係狀態下滑。先講防線:今季回歸港超,即將35歲嘅李志豪頭兩場都有出現明顯嘅失誤,對和富大埔嘅一次甩腳更導致佢被逐,為落敗埋下伏線;至於新加盟嘅亞援,32歲嘅南韓後衛曹泰根第一場踢陣地戰都仲可以勉強應付傑志嘅盧卡斯,但係迎戰和富大埔,面對迪亞高呢類速度較快嘅前鋒就明顯地比較吃力,喺李志豪缺陣之下領軍防線,帶住曾至孝踢嘅表現同樣一般,以外援嚟講其實真係唔合格。

另一方面,東方龍獅近幾季能夠喺港超居於前列位置,白鶴同迪高呢對防中絕對功不可沒。除咗負責掃蕩之外,佢哋都負責控制中場同比賽節奏。29歲嘅迪高仲正值盛年,但係33歲嘅白鶴嘅狀態都開始不如以往,掃蕩有餘但係傳送已經冇以往咁準繩。防線嘅第一度屏障冇咁堅固嘅時候,後場嘅問題就更加暴露於對手嘅眼前。

https://i1.wp.com/static.apple.nextmedia.com/images/e-paper/20170915/large/1505486340_874f.jpg?resize=694%2C462

 

後防開始冇咁穩陣,咁前場增添新兵之後,又有冇進步呢?以往嘅東方龍獅,係靠勞高串連中前場,配上兩翼 (通常係李康廉、麥基或者徐德帥) 嘅側擊同埋傳中,供應俾單箭頭洛迪古斯或者基奧雲尼又得,自己起腳又可以。呢個進攻模式其實到今季都冇乜大變動。

不過,今季開季嘅東方龍獅就有李康廉同埋洛迪古斯因傷缺陣,左翼同埋單箭頭都要由新兵頂上:不論係羅港威定係林學曦擔任左翼,其實表現都係一般;至於單箭頭嘅古高喺搶點、埋門觸覺上固然銳利,但係佢停球方面唔算突出之餘,比起洛迪古斯同埋基奧雲尼亦似乎更依賴中前場嘅供應;不過傷癒復出,上場正選登場嘅沙巴喺下半場移入中路之後,表現頗為亮眼,有力成為球隊嘅進攻核心。

球隊受到傷兵困擾,球員發揮一般,更大嘅問題係司徒文俊似乎都係照樣用返舊套路,臨場佈陣同埋調動嘅功力亦唔算出色,三場波嘅換人為球隊帶嚟嘅改變都唔大,例如對傑志嘅時候先後換入古高同埋張健峰,前者冇乜高波可以接應,後者傳中嘅機會同樣唔多;對和富大埔嘅時候,踢少一人之後嘅調動同樣顯得進退失據。唯一比較驚喜嘅,就係上場對理文起用徐德帥踢右閘,提升右路嘅助攻能力同埋傳中質素。呢三場以嚟,司徒文俊俾球迷嘅感覺都係依照住以往嘅戰術體系嚟教,不變應萬變,但係球隊表現又不如以往,戰績自然令人失望。

https://i2.wp.com/cdn.hk01.com/media/images/839854/xlarge/9a6f4f1cc33be9ab88c157619226c1d5.jpg?resize=694%2C462&ssl=1

三連敗之後屈居榜尾,東方龍獅當然可以期望李康廉同洛迪古斯復出之後,可以帶領球隊走出低谷;但係當球隊嘅主力陣容開始老化 (其實好多主將都已經30歲或者更大),狀態開始下滑,而球隊喺踢法上亦再冇突破,咁呢隊上屆嘅聯賽亞軍仲可唔可以繼續喺港超聯力追傑志,迎戰和富大埔、香港飛馬等挑戰者,同時應付亞冠盃外圍賽呢條戰線呢?老實講,小弟真係唔敢睇好。

圖片來源:香港01、蘋果日報、香港足總

Comments

comments