紐迷筆記:技不如人,又敗一仗|The Outsider

今日主場迎戰李斯特城,同時亦係球會125週年會慶,本應以一場勝仗賀壽不足為過,但係而家既紐卡素,由龍門到前鋒,有足夠實力應付英超強度既球員,真係屈指可數,最終85分鐘輸球烏龍波,2:3七場不勝……

場波本身受制於對方球員質素,係下風波預左。但係4分鐘紐卡素趁對方未入局,由何西路禁區接應基爾底線傳中,冷靜射入本季第3球。曾經為球迷帶嚟希望!不過李城小將格雷三番四次起腳、傳中,令主隊缺少隊長拿修斯既防線風聲鶴唳。

果然喺20分鐘,馬列斯一記角度不刁鑽、過程未有被緊纏既遠射,為李城追成平手。後防同中場有空檔係失誤,但係門將戴奴亦難辭其咎!雙手救波既失誤(意圖接球而唔係托走個波),難以令人對佢有信心。

之後格雷終於入波!呢腳由艾伯禮頓醒目,禁區頂控返個波做個炮台俾格雷,格雷60分鐘射出一個直入死角既靚波反超1:2!格雷終非池中物,今場顯示出佢既技術同攻擊性,留心留心。

基爾73分鐘乘李城後防角球解圍失誤,冷靜地禁區內扣返左腳射入追平2:2,為紐卡素帶回希望…但係86分鐘文基路喺對面禁區失機,被對方打反擊,華迪引嚟包夾之下,兩名防中未及回防,空晒既岡崎慎司正想出腳、艾約斯快一步篤入自己網窩!烏龍波!令客軍再次反勝2:3,全取3分。

呢場波最終喺擺烏龍情況下全失3分,係幾令人失望。球隊喺入波領先之後,竟然踢得患得患失,被馬列斯追平後更加方寸盡失,任由艾伯禮頓、格雷同馬列斯主宰中場。尼迪迪茅但係實效之下,美連奴同希頓完全比下去。一對箭頭雖然分別入波,但係面對摩根—轉身慢、出腳慢、多手多腳既中堅,竟然無甚表現;偏偏做到串連、落場令球隊追平既艾約斯,攞老烏入自己龍,紐卡素既鋒無力無不令人擔心。幸而隊長已經可以上陣,而左路艾素亦已經重新上陣,球隊之後四場硬仗,可以用番比較似樣既陣容上場,希望可以扭轉頹勢。

125週年,對紐卡素嚟講唔係小事。不幸今日落敗,亦非世界未日,反正球迷仍然支持球隊,那怕去到般尼茅夫咁遠,去到英冠咁悲情。要唔要鬧肥佬艾殊利?唔想嘥氣。唔賣唔投資係底線,到時只希望球員賣得就賣等人哋有主好人家,亦放走肥賓等佢發揮所長……一月肯定賣唔切盤,借人可能比肥佬開倉救人實際。凜冬將至,務實啲先可以渡過漫長既冬季。

Comments

comments