紐迷筆記:快車過後……|The Outsider

可能知恥近乎勇,紐卡素憑住唔想輸呢股熱血,快車期內除左主場僅負曼城0:1同賽和白禮頓外,作客力挫韋斯咸同史篤城,四場波執7分!呢幾場波陣中球員把握對手犯錯,場面係悶但有實效。其中贏史篤城嗰球,艾約斯配合積及梅菲妙傳,兩個人為肥賓同自己吐一口烏氣。梅菲嗰場多次展示個人技術同膽色,希望佢能夠持續進步喇!不過話需如此,現時紐記掛第13位,距離降班區只有2分已矣!好多球隊換領隊、補充新球員之際,紐記形勢真係愈來愈難樂觀!

老闆孤寒兼想賣盤抽身走人,一月要佢攞錢買人真係難過登天。肥賓入主前半季計起,紐記呢兩年幾買賣球員竟然錄得3M盈餘!夏天幾乎不作為之下,尚且引入美連奴應急,冬天如果賣盤持續膠著,肥賓除左動用人情牌借人之外,睇怕都要落力做推銷員,賣出幾個球員籌款買人了!

首先放上枱嘅係米杜域,賣走佢看似忽然其實必然。要知道前鋒無人,肥賓都較少用佢,季初入波之後領紅一事,確實令肥賓失望透頂。筆者其實對米杜域十分欣賞:有心有力,有頭槌、有身型,但係短路性格,令人又愛又恨。如果轉手換返10M左右,應該無乜問題。其餘一堆高碧克、希迪拉、沙維特,想搵賣家真係唔易。希望肥賓有計喇!

最後講下賣盤。呢個星期英國公司註冊名錄,被人發展有Ms Amanda 開新公司嘅記錄,有人就估會唔會係賣盤先兆?我就覺得係唔係無人知,大家就無謂太多推測。但係某啲英國fans 就好開心,仲有人話Lady 入主,到時大把錢,PSG同曼城都要行開!嗱,大家笑下就好喇,認真就輸了……都係嗰句:一切官宣先好作實。

#陳沖 #紐迷筆記 #TheOutsider

Comments

comments