紐迷筆記:賣盤失敗非世界末日…… | The Outsider

執筆之時堅尼地(Kenedy)應該做埋體測借用成功。堅尼地21歲巴西球員,可以打晒成條左路,左閘定左翼都係重要嘅補充,技術有一定保證,而且佢身體質素唔錯,希望俾到紐記新嘅衝擊。

而傳聞破紀錄加盟嘅前鋒,就好大機會係馬體會法籍前鋒加美路(Kévin Gameiro)。加美路可以踢正前鋒、同埋左右兩翼,有速度同射術,矮小精幹型球員。當然你會質疑點解要用£20M簽一個30歲嘅前鋒,不過我相信佢扣關能力可以幫到紐記搶分。£20M喺轉會市場來講,算係咩錢呢?當然之前傳過幾個球員嘅名字,媒體已經無再傳喇,大概都未必會再傳,咁就唔多提。如果冬窗只有上面兩單deal,個人來講係可以接受嘅。

賣盤唔成會唔會賣人先呢?傳莫天才想要佛地魔,個人歡迎之至!舒維喺而家呢套戰之中,需要佢勤力回防逗住中場,偏偏佢回防慢轉身又慢,好多時魯莽出腳捱罰,佢仲有幾多體力去傳嗰一腳靚波?如果釋放佢唔使回防,佢又唔見得好有幫助,分分鐘因為情緒失控領紅罰出場打少個。變成雞肋嘅佢送去韋斯咸喇!話唔定莫天才可以令佢成才呢?

最後講下賣盤喇。肥佬率先發炮,話Miss.A孤寒唔肯俾錢嘥時間。唔夠兩日就到Miss.A發炮,話佢自十一月以來出價三次,而且個價口同肥佬講嘅有出入,佢仲話對紐卡素未死心,而且仲喺訪問到大談佢對球會管理嘅諗法。

肥佬反口覆舌、大話精,人人都知不用多提,無人信佢都好正常。之不過Miss.A作為跨國金融集團操盤人,50M都計到盡,都唔係等閒之輩。佢講明就算收購成功,紐卡素都唔會變成曼城呢類富豪球會,營運上都唔會不論賺蝕咁大量投資,一巴打落啲幻想簽美斯、幾億買人嘅球迷塊面度!筆者同意理性地使錢,買人亦不能亂買,球會發展應該有長遠計劃。如果PCP好似利物浦嘅FSG我絕對唔抗拒:有球星、有場面、有歐聯踢,對紐記而言係福音!始終我哋包袱細,冠軍離我哋好遠好遠,唔降班都偷笑喇!故事應該未完,繼續觀望喇。

當然而家講乜都假,賣盤唔成好多fans都怕肥賓走。肥賓份人重情重義,走唔走呢個問題問足半年,佢始終都無講答案。有傳肥賓對賣盤抱有期望,而家無得易主,佢就會睇埋肥佬冬窗會唔會俾錢買人再作決定。所以,佢要加美路咋,肥佬你俾佢喇!

Comments

comments