也許年青球員對車路士嚟講只是一盤生意|藍獅

相信大家都唔會唔知道對上一個出自車路士青訓體系而成功上到一隊嘅球員,就只有前傳奇隊長泰利,而佢亦都喺岩岩哩一季離開球隊尋求正選機會。喺現今球壇下,各球會要培訓自家青訓球員成功晉身一隊上陣,並唔係一件容易嘅事,但係睇落只係在乎你有冇心去搞。可以睇下就算星光熠熠嘅皇馬都有個自家青訓莫拉達,馬體會亦有同屬西班牙籍嘅沙奧尼古斯、高基,就算曼聯比雲高爾錯有錯著都有個打得起嘅拉舒福特。

唔知睇開車路士一段日子嘅球迷仲記唔記得邊個叫「小麥」麥伊治蘭呢,佢可以話係藍軍進行改革前少有嘅青訓產品,曾經被寄予厚望能為林佰特接班,最失當然亦失敗告終。自車路士喺2012年勇奪歐冠盃後,油王艾巴莫域治似乎改變了車路士嘅定位,有意推動球隊年輕化,接連收購夏薩特、迪布尼、古圖爾斯等年青新一代進行改革,自此藍軍就往往喺轉會窗收購一啲潛力新星放到青年梯隊,按步就班一步步為一隊注入活力。

但近年車路士嘅動作似乎同當初外界所想像嘅有所不同,收購番黎嘅年青球員基本上唔會有晉身一隊嘅機會,球員主要會被外借,較為幼嫩嘅會先借到同藍軍關系良好嘅荷甲球會維迪斯,而較成熟嘅就會喺德甲、意甲甚至喺英超本地尋找球會作外借。然而經歷過一季後,哩一班外借兵大部份都會被其它球會視為收購目標提出正式報價,而轉會費亦會係當年車路士收購佢番黎嘅好幾倍,同樣事件唔單止發生在一個球員身上,而同樣事件亦唔止只係發生在一個轉會窗上。

明顯地車路士只係將年青球員視為一盤生意,青訓系統就只係佢地嘅加工場,查路巴、艾基及蘇蘭基經已成為製成品賣往屈福特、般尼茅夫及利物浦,而路夫施捷克、梅桑達等都逃不出被外借嘅命運。當然,基斯甸臣今季嘅回歸,無疑會比到一眾被無限外借嘅年輕小將一個希望,或許會驅使佢地進步,用表現吸引車路士讓他們晉身一隊。

但如果車路士高層繼續以短線投資概念,不斷套現出售有潛質嘅年輕球員,假以時日迪布尼、沙拉、盧卡古等例子就只會繼續出現,長遠黎睇放走年青球員只會係一盤無利可圖嘅生意。

呢一刻賬面上贏左,但最終輸家,亦會係車路士自己。

Comments

comments

Leave A Comment