紅軍小將阿禾尼爾為申領工作證困擾|Liverpudlian Ty

利物浦前鋒阿禾尼爾(Taiwo Awoniyi)承認,對於未能為紅軍效力感到失望。

現年 21 歲嘅尼日利亞前鋒阿禾尼爾,於 2015 年夏天加盟利物浦至今,都未能取得英國工作證。

阿禾尼爾喺今年 1 月,借往比甲球會梅斯干,表現惹人注目,踢咗 9 場,射入 7 球。呢次外借,已經係第 5 次。

但係,佢至今仍然未能入選尼日利亞國家隊,喺今個夏天能夠攞到工作證嘅機會唔大。喺咁嘅情況下,利物浦可能唯有喺今夏將佢出售。其中德甲球會史浩克 04 等歐洲球會渴望得到佢嘅加盟,佢嘅標價大約 £12M。

阿禾尼爾向 BBC Sport 表示:「我心裏感到難過,因為過去嗰 4 年,都好難攞到工作證。」

「喺今季結束嘅時候,我哋要返去利物浦作出討論。所有人都知道工作證嘅重要性,當中係如何運作,同埋你需要為你嘅國家隊上陣。」

「如果你得唔到為國家隊上陣嘅機會,要攞工作證就會變得困難。」

「個人嚟講,我選擇利物浦,係因為我想為利物浦踢英超聯賽。」

「如果神係話將會發生嘅話,咁就係將會發生架喇。但係如果唔係嘅話,咁我只能夠繼續自己嘅生活同埋事業。」

喺上個夏天與利物浦簽下一份長約嘅阿禾尼爾,非常希望憑著佢今季喺比利時聯賽嘅表現,能夠得到國家隊嘅徵召,佢現時係尼日利亞 U23 國腳。

非歐盟球員如果想攞到工作證嘅話,佢哋必需證明自己係「最高水準嘅」。

阿禾尼爾話:「尼日利亞擁有好多有天份嘅球員,無論邊個能夠為國家隊效力,佢哋應該要感到榮幸。」

「如果有呢個機會嘅話,我會感到高興,但係呢樣嘢並唔係你去強迫就會有嘅。你只能夠等待你嘅機會,同埋當機會來臨嘅時候,要好好把握。」

Comments

comments