[利物浦vs波圖]高普:持續勝利不代表爭勝變得更容易|Liverpudlian Ty

利物浦喺上星期五嘅英超聯賽作客修咸頓,最後反勝對手 3-1,繼續保持爭奪聯賽冠軍嘅希望。今次會喺主場出擊,迎戰葡超勁旅波圖,進行歐聯 8 強首回合賽事。雖然紅軍上季以 5-0 大勝,將波圖淘汰出局,但如今八強相遇,絕對不可掉以輕心。領隊高普及後衛雲迪克出席賽前記者招待會,主要內容如下:

1. 高普表示:「宜家好似當我哋喺賽事較後嘅時間取得入球,就係我哋好運,但係修咸頓同熱刺係完全唔同嘅。下半場我哋真係踢得好好,並且值得取勝,呢個係表現出我哋完全值得取勝。呢間球會永不放棄,同埋呢隊球隊都永不放棄。」

2. 高普話:「我哋嘅發展係令人難以置信嘅,我哋去用每一個步驟去作出改進。班球員成長咗,呢個係巨大嘅。歐洲賽之旅係精彩嘅。」

3. 講到對手波圖:「我哋要對波圖有同樣嘅尊重,佢哋係一隊非常有經驗嘅球隊,真係一隊強隊嚟。對於有呢個機會,我哋感到高興。」

4. 高普表示:「我哋習慣咗嘅情況係,我哋一直要去踢同埋要喺唔少嘅賽事之中爭取勝利,但並唔表示咁樣會令事情變得容易咗。我哋要投入,喺賽事與賽事之間進行恢復,然後繼續努力。呢個係一個美好嘅時間,春天嚟緊喇,氣候暖和,同埋我哋喺度競逐緊兩個大型錦標,我哋一齊善用呢個情況吖。」

5. 高普話:「我哋呢個時候處於上佳狀態,你可以喺操練時見到。我哋想為呢個球季,撰寫一啲主要嘅事跡。」

6. 談及沙拿,高普表示:「冇人曾經感到擔心,佢自己都冇感到擔心過。佢係一個已經成長嘅人,無論喺操練,或者喺球賽上,佢過往嘅工作效率經常都係好好嘅。但係當你射入咗一個世界級嘅入球,當然會對佢有幫助。係一個美妙嘅入球,好決定性,好重要。」

7. 高普話:「上年我哋作客波圖贏 5-0 嘅時候,當其時我諗,「好啦,我哋會有一段時間唔會再返嚟架喇。」但係我哋今次再次對佢哋。上年嘅戰果,對波圖嚟講更加重要。所以我哋要堅強、清晰、喺適當嘅時候直接同埋要有創造力。」

8. 關於祖高美斯嘅情況,高普表示:「祖高美斯喺未來一至兩個星期,需要進行更多嘅操練。」

9. 高普話,拉蘭拿可能會再次缺陣。韋拿杜姆及雲迪克有微傷,但係到時應該冇乜問題。

10. 高普認為:「所有人都話想遇上波圖,直至你真係要面對波圖。對足球有正確想法嘅人係唔會想遇到波圖嘅,但係佢哋亦都唔會想對利物浦。」

11. 雲迪克表示:「我認為我哋今季嘅表現相當唔錯,我哋曾經係有一段時間並冇踢出我哋想要嘅水平,但係我哋嘅表現係好穩定,同埋需要繼續努力,直至球季結束。」

12. 被問到爭取成為英超及歐聯雙冠王,雲迪克話:「我哋現時競逐緊呢兩項錦標,但係宜家去諗呢樣嘢實在太遙遠。任何嘅錯失都可能會令我哋付出代價,對佢哋嚟講都會係一樣。我哋要一場一場咁去應付。」

13. 講到沙拿,雲迪克表示:「沙拿曾經有幾場賽事冇取得入球,但係壓力只係來自媒體,佢仍然有一個好好嘅球季。」

14. 雲迪克認為:「我哋知道會係難應付嘅。波圖值得晉身歐聯八強,我哋將會成為被睇好嘅一方,但係幾乎踢每一場賽事都會經歷咁嘅情況。我哋需要享受其中,並且交出表現,同埋需要加倍努力。」

15. 雲迪克話:「我哋應該要利用發揮嘅自由空間,以便能夠展現我哋嘅質素同埋實力。喺歐聯賽事,同樣冇任何失誤嘅空間。因為上年嘅賽事,波圖正為復仇而來。」

16. 雲迪克表示:「英超冠軍係所有人都夢寐以求嘅。對我哋嚟講,有少少欠運嘅係,仲有另一隊波喺英超聯賽都係咁出色。」

17. 談及羅拔臣嘅停賽,雲迪克話:「我哋將會掛住羅拔臣,因為佢係全國最好嘅左後衛,但係之前我唔能夠上陣對拜仁慕尼黑,法賓奴都踢得好好。聽日將會有球員頂替佢嘅位置,我非常有信心,我哋將會冇問題嘅。」

18. 被問到波圖後衛伊達米列達奧,雲迪克回應:「我對佢嘅了解並唔太多,但係佢將會轉投皇家馬德里,所以佢一定唔會係太差嘅球員!」

Comments

comments

發表迴響