紅軍精簡陣容,佳尼、摩蘭奴、甘馬曹或帶頭離隊|Liverpudlian Ty

根據前 Liverpool Echo 記者,現時於 goal 任職嘅 Neil Jones,韋斯咸及般尼茅夫想羅致利物浦右閘佳尼。

呢位英格蘭右閘將於夏天離開利物浦,佢喺今季下半季借往般尼茅夫期間,表現不俗。

韋斯咸準備於夏天,與般尼茅夫爭奪佳尼。

利物浦將會俾佳尼喺今季結束時離隊,並且希望能夠得到一筆大約 £15M 嘅轉會費。

現年 28 歲嘅佳尼,喺一月開始借往般尼茅夫,出賽 12 次。般尼茅夫渴望喺轉會窗重開嘅時候將佢買斷,但係宜家要面對韋斯咸嘅競爭,佢哋喺今個夏天都渴望喺兩閘嘅位置上加強實力。

據了解,喺 2015 年由修咸頓加盟利物浦嘅佳尼,享受喺般尼茅夫嘅日子,並且與該隊領隊艾迪賀維建立咗好好嘅關係。

但係對於喺倫敦 Stockwell 出生同成長嘅佳尼嚟講,能夠重返倫敦嘅話,係會有相當嘅吸引力,所以或會令佢選擇韋斯咸都唔定。

韋斯咸現時喺英超聯賽榜比般尼茅夫高兩位,並且多 4 分積分,佢哋需要物色球員代替老將薩巴列達。佢哋相信佳尼擺脫差唔多有一年嘅傷患問題之後,再次展現能夠立足英超嘅能力,係一個理想人選。

不過,利物浦並唔會以低價進行轉會交易。紅軍喺過去 12 個月,將蘇蘭基及恩格斯售予其他英超球會,可見一斑, 並且佢哋有信心能夠喺佳尼身上得到一筆唔錯嘅轉會費。佳尼喺 2017 年受傷之前,正在爭奪成為英格蘭國家隊首席右閘嘅位置。

利物浦以李斯特城右閘列卡度佩雷拉作為例子,佢喺上個夏天,以 £17.5M 轉會費加盟,紅軍以此作為決定佳尼市值嘅參考。利物浦喺 4 年前,以 £12.5M 轉會費羅致佳尼,佢及後為利物浦上陣超過 100 次。

佳尼將會係利物浦喺今個夏天轉會窗嘅其中一位會離隊嘅球員,因為利物浦領隊高普想再次重整及精簡球隊陣容。

摩蘭奴及史杜歷治將於夏天自由轉會,米奴列可能會被賣走。同時,有幾位現時外借緊嘅年青球員包括奧祖、阿禾尼爾、古積、哈利威爾遜及賴恩肯特或會有可能離隊,利物浦已經接獲關於呢幾位球員嘅查詢。

葡萄牙年青球員拉菲爾甘馬曹係另一位或會離隊嘅球員,因為英超嘅狼隊,仲有葡超嘅賓菲加、士砵亭,甚至德甲嘅 RB 萊比錫等球會都對佢有興趣。

本身係葡萄牙小國腳嘅拉菲爾甘馬曹,喺 1 月嘅足總盃對狼隊嘅賽事,首次正式為利物浦上陣,及後喺聯賽對水晶宮場波後備入替。利物浦相信,佢哋將會能夠叫價 £10M 再加浮動條款。

Comments

comments

發表迴響